மலையாளத்தின் செம ஹிட் காதல் பாடலுக்கு எதிராக வழக்கு (Video)

‘ஓர் அதார் லவ்’ என்கிற திரைப்படத்தில் நடித்திருக்கும் பிரியா வாரியர் சினிமாவின் அடுத்த இலக்காக நிர்ணயிக்கப்பட்டிருக்கிறார். அவருக்கு எதிரான கோஷங்கள் தற்போது வலுப்பெறத் தொடங்கியிருக்கின்றன.

ஓர் அதார் லவ் படத்தில் இடம்பெறும் ‘மாணிக்க மலராயி பூவி’ என்ற பாடலின் மூலம் பிரியா பெரும் புகழ்பெற்றார். சமூக வலைதளங்களில் அதிகம் தேடப்பட்டவர் என்றும், இன்ஸ்டாகிராமில் அனைத்து கேரள திரை நட்சத்திரங்களை ஓவர்டேக் செய்தவர் என்றும் பாராட்டப்பட்டார். பாராட்டு எப்போதும் தனியே வராது என்பதுபோல, அவர் மீது புகார் கொடுக்கப்பட்டதாக ஒரு தகவலும் வெளியானது. புகார் வந்திருப்பதை ஹைதராபாத் காவல் துறையும் உறுதி செய்தது. ஆனால், அந்தப் புகார் என்னவென்பது வேறு மாதிரியாக மாற்றப்பட்டது.

புகார் கொடுக்கப்பட்ட தகவலறிந்ததும் ‘இஸ்லாமிய பெண்கள் பள்ளியிலேயே காதலிப்பது போல சித்திரித்திருக்கிறார்கள்’ என்று சொல்லப்பட்டது. ஆனால், காவல் துறையில் புகார் கொடுத்திருக்கும் முகமது அப்துல் முகீத் கான் அவரது புகாரில் தெளிவாகவே குறிப்பிட்டிருக்கிறார்.

வடகேரளாவில் வசிக்கும் இஸ்லாமியர்களால், அவர்களது குடும்ப விழாக்காலங்களில் பாடப்படும் பாடல் இது என்றும், இதைக் கொண்டுபோய் பள்ளியில் காதலிக்கும் சிறுவர்களின் காதலுக்குள் வைப்பது எங்கள் மதத்தை புண்படுத்தும் வகையில் இருக்கிறது என்றும் புகாரில் குறிப்பிட்டிருக்கிறார் முகீத் கான். இப்படியொரு நிலை ஏற்படும் என்பதை அறியாதவரல்ல ‘ஓர் ஆதார் லவ்’ படத்தின் இயக்குநர்.

Scroll.in இணையதளத்துக்கு அளித்த பேட்டியில், ‘சில இஸ்லாமியர்கள் இந்தப் பாடலுக்கு எதிர்ப்பு தெரிவிக்கலாம். ஆனால், அதற்கான உரிமையை நான் வாங்கியிருக்கிறேன். இவர்கள் மிகவும் மைனாரிட்டியாக இருப்பவர்கள். நான் பார்த்து வளர்ந்த ஒரு பாடல், என் சமூகத்தில் ஒன்றாகியிருக்கும் ஒரு பாடலை எப்படி என் படத்தில் பயன்படுத்தக்கூடாது என்று சொல்ல முடியும்?’ எனக் கேட்டிருக்கிறார். ஓமர் லுலு முன்வைக்கும் வாதம் சரியானது என்றாலும், தற்போது கேரள இஸ்லாமியர்களால் தமிழ், உருது கலந்து பாடப்படும் இந்தப் பாடலின் உண்மை வடிவம் எடுக்கப்பட்டது இஸ்லாமிய மதத்தின் முதல் நபி எனப்படும் முகமது மற்றும் அவரது மனைவி கடிஜா பிந்து குவைலிது ஆகியோருக்கிடையே பாடப்பட்ட பாடல் என்று கூறுகின்றனர்.

பல நூறு வருடங்களுக்கு முன்பு உருவாக்கப்பட்ட இந்தப் பாடல் மொழிமாற்றப்பட்டு, பல்வேறு இஸ்லாமியர்கள் வாழும் மாநிலங்களின் மொழிக்கேற்ப பாடப்பட்டிருக்கிறது. அப்படிப்பட்ட பாடலை, பள்ளியில் காதலிக்கும் சிலருக்கிடையேயான காதல் பாடலாக மாற்றியிருப்பதாக அதன் இயக்குநர் ஓமர் லுலு மீது புகார் அளிக்கப்பட்டிருக்கிறது.

ஐபிசி 295A சட்டத்தின்படி ஒரு மதத்தையோ அல்லது மத நம்பிக்கையையோ இழிவு செய்து, அதைச்சார்ந்த மக்களின் மனதைப் புண்படுத்தும் செயலாக இந்தப் புகாரை பதிவு செய்திருக்கிறார் தெற்கு ஹைதராபாத்தின் துணை ஆணையர் சத்யநாராயணா.

புகார் கொடுத்திருக்கும் முகீத் கான், “நாங்கள் மக்களை ஒன்றுதிரட்டி சாலையில் இறங்கிப் போராடப் போவதில்லை. சொல்லப்போனால், முதலில் வெளியான சிறு வீடியோவைப் பார்த்தபோது நானே அதை ரசித்தேன். ஆனால், முழுப்பாடலையும் கேட்டபோதுதான் எனக்கு அதன் அர்த்தம் புரிந்து இப்போது இந்த நிலைக்குக் கொண்டுவந்திருக்கிறது. சட்டபூர்வமான நடவடிக்கைகள் மட்டுமே எங்கள் அனைவராலும் முன்னெடுக்கப்படும்” என்று ஹிந்துஸ்தான் டைம்ஸுக்கு அளித்த பேட்டியில் தெளிவுபடுத்தினார்.

முகீத் தரப்பு முன்வைக்கும் கூற்றுக்கு ஓமர் லுலு சம்மதிக்கவில்லை. 1978இல் PMA Jabbar எழுதி தலசெரி ரஃபீக் மூலம் இசையமைக்கப்பட்ட பாடலின் ரீமேக் உரிமையை வாங்கி, அதன் இசையை மட்டும் ‘ஓர் அதார் லவ்’ படத்தின் இசையமைப்பாளர் ஷான் ரஹ்மான் மூலம் மாற்றியிருக்கிறோம் என்கிறார் ஓமர்.

ஓர் அதார் லவ் படத்தில் இடம்பெற்ற பாடல், முகமது தனது மனைவிக்கு எழுதியதாகச் சொல்லப்படும் பாடல் மற்றும் தலசெரி ரஃபீக் இசையமைத்த பாடல் ஆகியவை அனைத்தையும் முகீத்திடம் கேட்டு வாங்கியிருக்கின்றனர் காவல் துறையினர். புகார் கொடுக்கும்போதே அத்தனையையும் சமர்ப்பித்ததால் காவல் துறையின் பல பிரிவுகளுக்கும் இந்தப் பாடல் அனுப்பிவைக்கப்பட்டிருக்கிறது. படத்தின் இயக்குநர் ஓமர் லுலு மீது மட்டும் முதல் தகவல் அறிக்கை பதிவு செய்யப்பட்டிருக்கிறது.

Total Page Visits: 179 - Today Page Visits: 2